Ripa afirma que la dirección de Podemos trató d'amedranalu pa que nun se presentara a les primaries

El secretariu xeneral denuncia l'intentu del partíu de controlar Podemos Asturies

El secretariu xeneral de Podemos Asturies, Daniel Ripa, aseguró que la dirección nacional del so partíu trató d'amedranalu pa que nun se presentara a les primaries.

Nuna entrevista en TPA Noticies Matinal, Daniel Ripa afirmó que la candidatura de Sofía Castañón respuende a un intentu de Madrid d'aumentar el control sobre Podemos Asturies.

El secretariu xeneral de Podemos considera, per otru llau, qu'entá hai tiempu pa negociar la reforma del Estatutu. La reforma, sostién, dexaría a Asturies aumentar y blindar les sos competencies. Tamién desenvolver una llei que promueva la cooficialidá del asturianu.

Al Gobiernu del Principáu recriminó-y nun abrir l'alderique sobre la xestión de los fondos europeos y pidió-y voluntá política pa solucionar los problemes d'Asturies.

Recordó que Podemos Asturies ta dispuestu a algamar alcuerdos similares a los que se tán algamando nel Gobiernu d'España.

Podemos considera "decepcionante" el proyectu de Presupuestos presentáu pol Gobiernu

El secretariu xeneral de Podemos considera que'l proyectu de Presupuestos presentáu ayeri pol Gobiernu ye decepcionante. Daniel Ripa enumberó dalgunes de les cuestiones poles que'l so grupu va engarrase nes negociaciones.

Son la gratuidá nes escueles de 0 a 3, un fondu de rescate pa la industria, un refuerzu de la sanidá pública, meyores na atención en Salú Mental y una fiscalidá que beneficie al mediu rural y les rentes más baxes. Ripa amosóse dispuestu a negociar.