Sigue la esmolición ente los vecinos de la zona rural xixonesa pola fola de robos en viviendes

L'últimu robu diose fai una selmana y piden al conceyu la instalación de cámares

Los vecinos de la zona rural xixonesa siguen a la espera de la instalación de cámares de vídeovixilancia en distintos puntos de les parroquies énte los continuos robos que sufren.

El postreru del que tienen constancia diose fai una selmana nuna vivienda de Castiello dempués d'una temporada ensin sustos.

Temen qu'esti puea ser l'entamu d'una nueva fola de robos. Anque reconocen que la presencia policial medró nos últimos meses, aseguren sentise abandonaos poles alministraciones y repiten el so pidimientu d'instalar cámares de vixilancia que disuadan a lladrones y faciliten los llabores d'investigación en casu de robu.

El Conceyu de Xixón esplica que tán acabando la propuesta p'allugar les cámares, que tendrá que ser aprobada pola Xunta local de Seguridá enantes de que se tresllade a la Delegación de Gobiernu.