Suiza refuga la entrega temporal del presuntu autor de la muerte d’Ardines

La Fiscalía de Berna opónse porque l'acusáu tien pendiente un xuiciu por otros delitos

La xusticia suiza volvió refugar la entrega temporal del ciudadanu de nacionalidá arxelina investigáu como unu de los presuntos autores de la muerte del conceyal d'IX nel Conceyu de Llanes, Javier Ardines, al tener un xuiciu pendiente nel país helvéticu.

La Fiscalía del cantón de Berna yá s'opunxo'l pasáu mes de xunu a la entrega temporal de K.M. al tener pendiente un xuiciu'l próximu 17 d'avientu por delitos cometíos dempués del asesinatu d’Ardines, que tuvo llugar el 16 d'agostu de 2018.

El Xulgáu de primer Instancia y Instrucción de Llanes empobinárase de nuevo a les autoridaes suices pa volver pidir la entrega temporal col envís de facer delles dilixencies d'instrucción, pero les autoridaes suices alegaron los mesmos motivos pa refugar el pidimientu, según informó'l Tribunal Cimeru de Xusticia d'Asturies (TCXA).

Sicasí, la Oficina Federal de Xusticia de Suiza comprometióse a caltener informaes en tou momentu a les autoridaes españoles sobro la situación penal del investigáu nel país helvéticu y sobro la fecha na que podría efectuase la so entrega temporal o inclusive definitiva.

Pol asesinatu d'Ardines foi deteníu'l 19 de febreru d'esti añu na so vivienda d'Amorebieta (Vizcaya) Pedro L.N.A., amigu personal del conceyal, como presuntu inductor al encargar presuntamente'l crime a dos sicarios non profesionales movíu polos celos énte los sos barruntos sobre una posible relación ente la so muyer y el conceyal.

El mesmu día tamién fueron deteníos en Vizcaya unu de los dos supuestos sicarios, D.B., de nacionalidá arxelina al igual que'l que ta en Suiza, y J.M.B., que según los investigadores pudo servir d'enllaz ente l’inductor y los autores materiales.

Na so declaración énte la xueza, D.B. afirmó que l'inductor pagó-yos a él y al otru autor material 25.000 euros y al mediador otros 10.000.

Según los investigadores, el presuntu inductor entamó con tiempu y detalle l'asesinatu del que fuera'l so amigu movíu polos celos.

Ardines, que renunciara al so sueldu de conceyal y ganábase la vida como patrón de barcu, tenía unes rutines y unos horarios que facíen fácil calcular los sos movimientos porque salía a diario sobro les 6:30 hores a faenar cola so embarcación "Bramadoria" enantes d'atender a les sos responsabilidaes municipales.

Dellos díes enantes del so asesinatu, el conceyal, de 52 años, casáu y padre de dos fíos, comentó a la so redolada daqué que-y llamara l'atención, el fechu de qu'atopara unes valles puestes nel camín rural pel que circulaba toles mañanes.

Naquella ocasión, Ardines decidió baxar del coche pa quitar les valles y siguir el so percorríu hasta'l cai de Llanes ensin más incidencia, pero'l 16 d'agostu tres valles d'obra volvíen torga-y el pasu y, cuando se baxó de la furgoneta col motor entá en marcha pa quitales, foi sorprendíu polos sos asesinos.

L'autopsia reveló que'l conceyal morrió de dellos golpes na cabeza y nuca con un oxetu contundente de manera que namás pudo movese unos metros enantes de cayer esbarrumbáu onde poco dempués foi atopáu muertu por un vecín.