TPA fadrá un gran despliegue informativu qu’acabará con un programa especial

L’espaciu incluyirá dende les 20:00 conexones coles siete sedes y el siguimientu del escrutiniu

Yá ta too preparao nos colexos electorales d’Asturies pa la triple cita electoral de mañana. Foi una xornada de gran trabayu pa colocar urnes, papeletes y cabines.

Namái n’Avilés, por exemplu, colocáronse más de tres millones de papeletes. 974.000 asturianos tán llamaos a les urnes esti domingu. 30.000 menos que va cuatro años.

En total mañana habrá 1.573 meses electorales en tos Asturies. Escoyeránse a 45 diputaos y 928 conceyales, 14 menos que va cuatro años. Los colexos electorales abrirán a les 21:00 y zarrarán a les 20:00.

Unes elecciones nes que los resultaos podrán siguise en directo al traviés d’una web habilitada pol Principáu y una aplicación. En total 900 representantes con 701 tabletes encargaránse de tresmitir los datos de cada mesa.

Too quedó preparao pa les elecciones locales, autonómiques y europees de mañana. Cuasi 975.000 asturianos tienen derechu a votu. Son 30.000 menos que va cuatro años.

Manuel Ángel Hidalgo ye l’alma máter de les elecciones n’Avilés. Dende va 30 años encárgase de preparar cada cita electoral. Les de mañana asegura que fueron una de les más complicaes. Organizó en total 24 elecciones, lo que dexa na so memoria decenes d’anécdotes.

Hildago como cada viéspora electoral percorre güei los 20 colexos electorales de la ciudá. Comprueba y certifica que les papeletes, les urnes y les cabines tán llistes pa les votaciones.