Tráficu autoriza l'allugamientu d'un radar de tramu nel Corredor del Nalón

Llenda la velocidá a 80 kilómetros per hora ente Sama y Llaviana y prohíbense los adelantamientos ente Sama y L'Entregu

El radar del Corredor del Nalón allugáu onde la pasada selmana hebo l'últimu accidente mortal va siguir como agora, ensin usu. Hai caxa, pero ta vacía. Nel so llugar instalaráse un radar de tramu nun allugamientu entá por afitar. Va ser la Xefatura Provincial de Tráficu la qu'en cuestión de díes afite ónde instalalu. La DXT yá lo autorizó. Hasta la so instalación, Tráficu va intensificar los controles na zona con radares móviles.

Llendar la velocidá a 80 kilómetros per hora ente Sama y Llaviana y prohibir los adelantamientos ente Sama y L'Entregu, tramu pal que se llicitará una mediana que nun va poder ser entera de formigón, son dos de les midíes al curtiu plazu pa intentar amenorgar la siniestralidá nel Corredor.

Fueron alcordaes esta selmana ente'l Principáu y la DXT y tán tamién recoyíes nel informe redactáu pol Colexu d'Inxenieros de Caminos d'Asturies. Nél aseguren que técnicamente'l desdoble del Corredor del Nalón ye posible pero alvierten de la necesaria valoración por parte de los responsables políticos del impactu social y económicu de la obra.

A la espera del nuevu estudiu d'alternatives que'l Principáu se comprometió a llicitar esti mesmu mes, la conseyería calcula que desdoblar los 3 kms y mediu que separten Sama y L'Entregu costaría non menos de 60 millones y afectaría, alvierten los inxenieros, a viviendes y industries.

La cuenca del Nalón perdió población, pero'l corredor nun perdió tráficu. Los alcaldes quexábense esta selmana de les faltes del tresporte públicu per carretera. Los inxenieros piden aprovechar l'usu del ferrocarril. Un aspeutu, dicen, refugáu nel so día nel Plan d'Infraestructures pa la Movilidá d'Asturies, el PIMA, redactáu fai agora 10 años.