Trenta quemes siguen actives n'Asturies

Guillermo Martínez señaló que la situación "meyoró muncho" nes últimes hores

Trenta quemes siguen actives esta tarde en 21 conceyos asturianos, una cifra "mui elevada" anque menor que la que se rexistraba ayeri a la mesma hora, según señaló'l conseyeru de Presidencia del Principáu, Guillermo Martínez.

Martínez, que foi al conceyu d'Eilao pa siguir les xeres d'estinción. Señaló que'l Principáu caltién la "preocupación" pola situación xenerada dende'l miércoles pasáu cuando entamaron los munchos fueos n'Asturies anque la situación "meyoró abondo" nes últimes hores.

Amás, destacó'l "estraordinariu esfuerzu" fechu polos equipos autonómicos, estatales y municipales que trabayen p'apagar les quemes tres una nueche "complicada" na que tuvieron que trabayar especialmente nuna de les quemes declaraes n'Ibias qu'amenazaba la Reserva Integral de Muniel.los.

El conseyeru recordó amás que nes condiciones meteorolóxiques d'anguaño ta prohibíu facer quemes y que faceles xenera consecuencies penales, amás de que les investigaciones de los caberos años constaten que les más de les quemes que se rexistren n'Asturies son provocaes.

Una de les quemes que más preocupa ye la qu'afecta a la redolada del embalse de Grandas. Pela tarde, la fuerza'l vientu impidió que se controle y, amás, les llames estendiéronse pel flancu derechu.

El fumu torga la participación de los helicópteros, y los escasos accesos terrestres nun dexen trabayar a pie.
El fueu afecta tamién a les decenes de pelegrinos qu'en primavera pasen per Grandas. Les llames obligaron a modificar la etapa del Camín Primitivu ente Berducedo, n'Allande, y Grandas, de 21 kilómetros.