Tres díes pa sentir a los cuatro acusaos pol asesinatu de Javier Ardines

Esti martes entama n'Uviéu'l xuiciu pol crime del conceyal

L’Audiencia Provincial d’Uviéu acoyerá dende mañana, martes, la vista oral énte xuráu popular pol asesinatu del conceyal d’IX en Llanes Javier Ardines, cometíu’l 16 d’agostu de 2018 y pol que la Fiscalía y l’acusación particular pidirán una pena individual de 25 años pa caún de los cuatro acusaos.

Nel bancu de los acusaos sentaránse Pedro N.A., amigu personal d’Ardines y presuntu inductor del crime por celos; los presuntos autores materiales y sicarios Djilali B. y Maamar K., y el señaláu polos investigadores como intermediariu, Jesús M.

El casu sedrá asumíu polos nueve candidatos y los dos suplentes que fueron escoyíos el vienres pasáu pa formar el xuráu popular.

El xuiciu, que s’allargará 18 sesiones en payares, llega cuasi tres años y tres meses dempués del crime, qu’esixó una dura investigación que s’allargó seis meses hasta dar colos presuntos autores.