UXT y CCOO alvierten del impactu de la pandemia sobre la igualdá de xéneru

Reclamen la eliminación "de toles formes de  discriminación y violencia pa coles muyeres"

Al rodiu de 120 persones participaron esti mediudía n’Uviéu na concentración convocada por UXT y CCOO pa celebrar el Día de la Muyer, na que reivindicaron la importancia de "lluchar con más fuerza que nunca" pa superar l’impactu que la pandemia del coronavirus ta teniendo sobre la igualdá de xéneru.

La Plaza d’España de la capital asturiana foi l’escenariu d’una celebración, marcada pola distancia social necesaria pa garantizar les midíes sanitaries, na qu’hubo pancartes col lema "Igualdá: más fechos, menos palabres" y "Vives, llibres, xuníes pola igualdá".

Les secretaries d’Igualdá d’UXT y CCOO d’Asturies, Carmen Escandón y Ana Rodríguez, respectivamente, fueron les encargaes de lleer un manifiestu nel que reclamaron la igualdá real ente homes y muyeres y la eliminación "de toles formes de discriminación y violencia pa coles muyeres".