UXT y CCOO señalen que l'ERE en Duro supón dexala inoperativa

Barbón destaca que va ser necesario garantizar la viabilidá de la compañía

UXT y CCOO espresaron güei'l so refugu dafechu al ERE plantegáu por Duro Felguera a 208 trabayadores de la plantiya. Señalen que la midida, qu'afectaría al 35% de les cuatro empreses de la compañía supón dexala inoperativa.

Amiesten que l'ERE nun tien nenguna xustificación dempués que la empresa tuviera un rescate públicu de 120 millones d'euros y unos beneficios nel últimu exerciciu de más d'un millón d'euros.

Les federaciones d'Industria de dambos sindicatos y los sos representantes nel comité d'empresa faen un llamamientu a la población pa que secunden una concentración de protesta'l próximu 18 d'ochobre énte'l Conceyu de Xixón. Y esperen una seronda caliente de movilizaciones pa revertir la propuesta.

El presidente del Principáu repitió que ye'l momentu de la negociación ente sindicatos y empresa. Sicasí, Adrián Barbón destacó que va ser necesario garantizar la viabilidá de la compañía.