Un 'food truck' con hamburgueses en L'Altu la Farrapona

Los creadores de la propuesta tán sorprendíos cola bona acoyida

Dende va dos meses en L’Altu la Farrapona puen comese hamburgueses con vistes. Les que faen nel 'food truck' asitiáu a mayor altitú del norte d’España. Una idea loca, confiesen los sos creadores, que resultó ser un éxitu.

Dalgunos llámenlu yá’l "oasis de Somiedu". Falen d’un 'food truck' a 1.708 metros d’altitú en L’Altu la Farrapona, que convida a parar y comer una hamburguesa casera o refrescase con unes impresionantes vistes d’El Valle Saliencia. Con un éxitu que sorprendió hasta a los sos creadores, un inxenieru y una publicista.

Hamburgueses de xata asturiana, de xabaril o veganes, cerveza de Borines y agua de Somiedu, que se convierten nuna bona sorpresa p’autóctonos y turistes.

Esperen que’l tiempu los dexe tar abiertos hasta finales de setiembre porque, insisten, que si les comides son de foto, les cenes viendo la puesta de sol son dignes de postal.