Un añu ensin Ardines

Los tres deteníos pol crime lleven seis meses na cárcel d'Asturies

Güei cúmplese un añu del crime del conceyal llaniscu d'IX, Javier Ardines. Foi asesináu por celos, a pocos metros de la so casa.

Los tres deteníos por entamar un plan p'acabar cola so vida lleven seis meses na cárcel. La instrucción ta pendiente de la estradición d'unu de los sicarios dende Suiza.

Javier Ardines, foi asesináu a primer hora de la mañana del 16 d'agostu de 2018, mui cerca de la so casa. El conceyal d'IX, de 52 años foi víctima d'una emboscada cuando diba al cai pa salir a faenar cola so embarcación.

Tres valles d'obra torgáben-y el pasu. Atacáronlu cuando baxó a quitales. Pudo percorrer 60 metros, pero acabó cayendo. Entamaron entós los rumores sobro la so muerte. Abriéronse delles llinies d'investigación, y los axentes afondaron nuna, la del móvil sentimental. Y acertaron.

A los seis meses, cuatro persones fueron deteníes por preparar un plan p'acabar cola so vida. En Bilbao arrestaron al consideráu inductor del crime, Pedro Nieva, home d'una prima política de la víctima - cola que presuntamente caltenía una rellación estramatrimonial.

Foi Nieva, quien movíu polos celos, buscaría un intermediariu pa cometer el crime. Un intemediariu qu'encargó'l trabayu a dos sicarios arxelinos en cuenta de 25.000 euros.
Unu d'ellos consiguió fuxir a Suiza, onde foi deteníu por delitos cometíos ellí, a la espera de ser estraditáu.

Los otros tres deteníos lleven mediu añu na cárcel d'Asturies.