Un conveniu va evitar la espublización en prensa de les víctimes d'agresión sexual

La directora xeneral d'Igualdá, Nuria Varela, llevó alantre esta iniciativa

Un alcuerdu robláu pol Gobiernu d'Asturies, los medios de comunicación que trabayen nel ámbitu xeográficu de la comunidá autónoma y les asociaciones de profesionales de la información del Principáu quier evitar l'espardimientu de cualquier información o imáxenes que faciliten la identificación de les víctimes de violación o agresiones sexuales.

Esti conveniu foi robláu esti xueves por El Comercio, La Nueva España, La Voz de Avilés, La Voz de Asturias y La Voz del Trubia; les cadenes de radio Onda Cero, Cope, Radio Asturias-Cadena Ser, RNE y RPA; les televisiones públiques qu'operen nel Principáu, TVE y TPA, y la Canal 10 Televisión; les axencies de noticies EFE y Europa Press; l'Asociación de la Prensa d'Uviéu y el Colexu Profesional de Periodistes d'Asturies.

La directora xeneral d'Igualdá, Nuria Varela, llevó alantre esta iniciativa, sabedora del papel insustituible que los medios desempeñen na sociedá, y coles mires de meyorar el tratamientu informativu de los casos de violaciones y agresiones sexuales que dende'l pasáu payares s'atienden nel centru de crisis d'Uviéu.