Un total de 139 denuncies de la Policía Nacional en 24 hores
Siete axentes del cuerpu contaxáronse dende'l 14 de marzu
Na xornada d'ayeri, la Policía Nacional punxo 139 denuncies n'Asturies por incumplir dalguna de les midíes de confinamientu decretaes pol estáu d'alarma.
En total, esti cuerpu de seguridá emitió 790 sanciones dende'l 14 de marzu. Once persones fueron prindaes esti periodu, nel que se contaxaron siete axentes de la Nacional.
Nos controles, la Policía vela pol cumplimientu de les midíes impuestes. Revísense los documentos y compruébase la veracidá de los testimonios.
Los más de los conductores muévense con una causa xustificada. Por trabayu, p'atender a dalgún familiar, dir al hospital, o inclusive comprar o dir a la farmacia, si ye que necesiten el coche pa ello.
Anque tamién hai persones que dicen garrar el coche, por exemplu, pa sacar dineru nel conceyu vecín, teniendo caxeros nel so barriu. Estos, son sancionaos.
Los controles de la Policía Nacional amiéstense a los que, na so demarcación, realiza la Guardia Civil.