Un total de 60 de los 78 conceyos cierren la ufierta pa estabilizar empléu públicu

Los consistorios alcuerden colos sindicatos unes 4.500 places interines

Los conceyos asturianos tán peracabando la ufierta pública de places d'interinos que se van convertir en fixos. Según CCOO, la cifra yá se cerró en más de la metá de los conceyos.

Un total de 60 de los 78 conceyos asturianos cerraron yá la ufierta pa estabilizar empléu públicu. Los consistorios alcordaron colos sindicatos unes 4.500 places interines de les cuasi 5.000 que s'incluyen nesi procesu.

En Xixón, algamóse yá un alcuerdu y solo falten por sumar les places d'interinos nes empreses municipales, ente 10 y 20 persones. La ufierta de Xixón, inclúi a los trabayadores de les escueles de 0 a 3. La so situación xeneró munches discrepancies, yá qu'anque la so xestión ye municipal, hai consistorios que les consideren competencia del Principáu.

Mieres va estabilizar 156 places d'empléu públicu. Son tolos interinos sacantes los 14 trabayadores de la escuela de 0 a 3. En Llangréu van consolidase 40 places, na so mayoría de la escuela infantil y del centru de sofitu a la integración de Pando.

En Siero van ser malapenes una ventena de puestos de trabayu yá que tien una baxa temporalidá. Avilés yá anunció que va convertir n'indefiníos 185 puestos ocupaos hasta agora por interinos. Fuera queda la plantiya de les escueles infantiles.

La ufierta tien qu'asoleyase nel BOPA enantes del 1 de xunu.