Una ventena d'empreses asturianes podríen beneficiase cada añu de la nueva llei de startups

Una norma pionera n'Europa qu'ufierta ventayes fiscales a negocios incipientes basaos na anovación

Empreses con non más de cinco años d'antigüedá, qu'ufierten productos o servicios anovadores, normalmente de base tecnolóxica. La llei de les conocíes como startups da-yos una categoría que les estrema del restu d'empreses. Una norma pionera n'Europa de la que podríen beneficiase alredor d'una ventena de negocios emerxentes n'Asturies cada añu.

Les empreses d'Ángel Colao y Rubén Hernández son dos de les aspirantes. Una, combina l'análisis de datos y la intelixencia artificial p'amenorgar la carga de trabayu de los sanitarios; la otra, fai diagnósticos dixitales de la piel al traviés del móvil pa diseñar cosméticos personalizaos.

La llei favorez l'atracción de capital inversor con incentivos fiscales y fomenta l'emprendimienti rural. La llei de startups tamién regula la figura de los nómades dixitales facilitando los visaos pal teletrabayu internacional.