Unu de los deteníos reconoz que-y dio una patada a David Carragal

Cuideiru llora al mozu profesor

Día mui murniu'l de güei en Cuideiru. Pela mañana multitudinariu minutu de silenciu frente a la Casa Conceyu pol crime d'unu de los sos vecinos y pela tarde, veloriu nel tanatoriu. David Carragal yera un mozu mui conocíu y sobre manera mui queríu nel so conceyu natal.

Mientres, los tres deteníos pol terrible socesu fueron a última hora del llunes a la policía pa declarar de manera voluntaria por conseyu del so abogáu y una vegada ellí, fueron prindaos.

Aseguren que nun pensaron que yeren ellos los supuestos autores de l'agresión porque creíen que se buscaba a seis persones, non a tres, y porque nes fiestes de La Florida hebo delles engarradielles aquella nueche.

Los mozos fueron a comisaría, según conseña la so defensa, pa collaborar cola xusticia. Na so declaración, namás unu d'ellos reconoció que-y dio a la víctima una única patada pero nun sabe ónde nin lo que socedió dempués, a pesar de qu'aseguraron qu'esa nueche malapenes bebieren. Lo otros dos negaron participar.

La policía asegura que tien pruebes de la so implicación y caltién un llamamientu a la ciudadanía p'atopar más testificales.

Los tres deteníos, de 18 y 19 años, coincidieron en que foi la víctima, David Carragal, quien los increpó cuando s'atoparon con él.

La sociedá llanisca ta conmocionada pola detención de tres de los sos vecinos. Los que más los conocíen nun lo acaben de creer porque toos pertenecen a families conocíes del conceyu llaniscu.

Los tres son del conceyu de Llanes, anque unu d'ellos vive n'Uviéu. Dos d'ellos xugaron nes categoríes inferiores del Llanes. Unu d'ellos, natural de la capital del conceyu, xugó esta temporada colos xuveniles del Llanes na Lliga Nacional y debutó col de Tercera nunu de los últimos partíos d'esta temporada.

L'otru, natural de Nueva, fichó anguaño pol Ribeseya procedente de les categoríes de futbol base del Llanes. Fízolo colos de rexonal preferente.

Na última selmana fixeron vida normal hasta qu'ayeri pela tarde, tres confirmase la muerte de la víctima, decidieron entregase.

Ta previsto que los tres deteníos pasen la so segunda nueche nos cuartones de la comisaría de la capital dempués de declarar tol día.