Uviéu destinará 55.000 euros al Centru de Tecnificación del Axedrez

Asitiaráse nel xalé La Casina

L'Ayuntamientu d'Uviéu destinará 55.000 euros al centru de Tecnificación del Axedrez que s'asitiará nel xalé conocíu como La Casina, asitiáu na parcela del colexu Germán Fernández Ramos.

Una instalación que tará abierta a la comunidá pero que vien impulsada dende'l colexu de Pando, nel que l'axedrez ye ferramienta tresversal, y del qu'amás yá salieron dellos campeones axedrecistes.

Va más de 30 años, un profesor del centru, Manuel Garrido, inxertó'l xuegu nes clases. Llueu llegaron los torneos nacionales, yá dos, y col nome de la meyor xugadora d'axedrez de la historia, Judith Polgár.

Agora les clases proyéctense tamién pa fuera con esti centru de tecnificación, xugada mayestra dende l'Ayuntamientu, que yá imparte ellí clases al traviés de la Universidá Popular, y aplaudida dende la redolada axedrecista uvieina.