Uviéu reparte 7.000 bollos nel día grande de San Mateo

L'Ayuntamientu asumirá la organización de les fiestes a partir del próximu añu

Un total de 7.000 bollos y botelles de vinu repartiéronse güei na Plaza España con motivu del día grande de San Mateo.

El repartu fízose ente los más de 5.000 socios de la SOF y ente los funcionarios municipales que celebren esti día n'El Campo San Francisco acompañaos, como manda la tradición, d'amigos y familiares.

Nesti día, el conceyal de Cultura d'Uviéu y presidente de la Sociedá Ovetense de Festexos (SOF), Roberto Sánchez Ramos, anunció, amás, qu'a partir del añu que vien el Conceyu va facese cargu de la organización de les fiestes de San Mateo, ante'l cambiu llexislativu qu'impedirá a la SOF llevar alantre estes funciones.

Sánchez Ramos declaró que'l PP, coles lleis de los últimos años, "cargóse la SOF", qu'al ser considerada una sociedá privada nun podrá tener privilexos na axudicación nin contratación de les fiestes, pero esplicó que l'Ayuntamientu va facese cargu d'estes funciones, y que se pondrán a trabayar nelles dende ochobre, col mesmu "oxetivu públicu".

Sánchez Ramos acompañó al alcalde d'Uviéu, Wenceslao López, nun actu nel que tamién tuvo la teniente d'alcalde d'Uviéu, Ana Taboada.

L'alcalde señaló que l'oxetivu de les fiestes de San Mateo ye que la xente "lo pase bien", dalgo que dio por cumplío, y celebró que'l tiempu acompañara a la ciudá nestes cuasi dos selmanes de celebración.

Pela so parte, Taboada conseñó qu'estes fiestes valen pa que los cargos públicos tean "coldu con coldu cola ciudadanía", y anunció que la so formación dirá güei a una xinta popular nel barriu de Fozaneldi, yá que consideren qu'hai que celebrar esta fiesta non sólo nel corazón de la ciudá, sinón en tolos barrios.

Per otra parte, Sánchez Ramos anunció que la so intención pal añu que vien ye allugar un escenariu "permanente", que permita facer actividaes musicales de toa mena, y evitar la entrada de camiones n'El Parque San Francisco, que provocaron un leve problema circulatoriu ayeri.

Tamién esplico que tán estudiando la posibilidá d'organizar conciertos en San Llázaro, pero qu'hasta'l momentu esi recintu nun tien salíes d'emerxencia, y el so gobiernu nun ta dispuestu a asumir esos riesgos organizativos ensin un plan d'emerxencia.

Per último, felicitó tanto a los trabayadores como a la ciudadanía d'Uviéu y Asturies en xeneral, porque "fizo suyes" les fiestes de San Mateo, y aseguró que tratarán de consolidar los elementos culturales y populares pa los próximos años.