Vecinos de viviendes públiques d'Uviéu algamen amenorgar hasta un 43% el so consumu de gas
![Contador de gas en una vivienda de Vipasa en Oviedo](https://www.rtpa.es/fotos//21/06/20210619120241_RTPA900660.jpg)
Proyectu pilotu basáu na instalación de sensores d'humedá, temperatura y CO2 en cada casa
Un edificiu de viviendes públiques d’Uviéu algamó aforrar hasta un 43% el consumu añal de gas y hasta un 20% el de la lluz. Algamólo gracies a un proyectu pilotu basáu na instalación de sensores nes viviendes y aplicaciones móviles pa que cada vecín conociere, a tiempu real, lo que-y cuesta esa enerxía.
Los 54 vecinos de tres portales de viviendes públiques d’Uviéu con servicios centralizaos algamaron nun añu amenorgar los sos consumos de gas hasta un 43%. Ficiéronlo instalando sensores d’humedá, temperatura y CO2 en cada vivienda.
Amás a cada vecín, al traviés d’una aplicación o una tablet lléga-y la información de lo que ta consumiendo en cada momentu, n’euros, pa que seya consciente de lo que gasta.
Nel casu del consumu d’electricidá, la mengua algamó al 20% y bastó con un simple asesoramientu a cada vecín. Cuasi’l 40% camudaron el so contratu coles eléctriques.
L’éxitu d’esti proyectu pilotu llevó a Vipasa a plantease la so instalación n’otros edificios públicos.
Sobre’l costu d’estos proyectos, aseguren que col aforru na factura d’un añu, pue amortizase la instalación.