Villa acoyóse al so derechu a nun declarar tres ser consideráu aptu pol informe forense

La investigación da un papel relevante al ex-asesor fiscal del Montepío

La declaración de Fernández Villa en sede xudicial, pola denuncia del SOMA, foi una de les pruebes determinantes que llevaron a los forenses a consideralu capaz d'enfrentase a un nuevu interrogatoriu xudicial. Nesti casu, na Operación Hulla.

Consideráronlu aptu pa declarar y lleváronlu ante la xueza'l pasáu xueves pero l'ex-líder mineru acoyóse al so derechu a nun declarar.

Hai xustamente una selmana llevábase alantre la Operación Hulla n'Asturies qu'acababa con una ventena d'investigaos, con Fernández Villa a la cabeza.

Cuatro persones yeren prindaes, ente elles el que fuera presidente del Montepío, José Antonio Postigo, y l'ex-asesor Fiscal José Manuel Fernández.

Según pudo saber TPA, a esti últimu la investigación da-y un papel relevante nesta supuesta trama. Non sólo foi abogáu del Montepío, apaez tamién como una de les persones que decidió que la obra del xeriátricu de Felechosa s'axudicara a la empresa Alcedo de los Caballeros.

Según la investigación, José Manuel Fernández tamién ye l'asesor que regularizó'l dineru de l'amnistía fiscal de Fernández Villa y de Postigo y la persona qu'ellaboró los contratos de los familiares d'estos sindicalistes tanto col xeriátricu de Felechosa como cola constructora que lu punxo a funcionar.

Los informes periciales amuesen qu'hai nicios claros de que'l fraude en rellación cola construcción d'esti complexu pudo superar los 15 millones d'euros.

Nun s'espera que, nun plazu curtiu, haya nueves declaraciones nel xulgáu. Per ellí yá pasaron como testigos, ente otros, el presidente del Montepío de la Minería, Juan José Pulgar, l'ex-conseyeru Graciano Torre y l'ex-líder de Comisiones Obreres Mino García.

El sumariu acumula miles de folios que van ser unviaos al Principáu pa que los escanee. Son siete tomos, más les documentales, qu'agora tienen qu'allugar, foliar y escaniar enantes de dar tresláu a les partes.

Pel xulgáu averáronse güei delles de les defenses de los investigaos que son conscientes de qu'este trabayu llevará'l so tiempu.