Villa refuga que les robles en cheques y tresferencies del SOMA seyan de so

Llegó a dicir que se sentía "ofendíu" énte les acusaciones

L'ex-secretariu xeneral del SOMA-UXT José Ángel Fernández Villa, que güei declaró como investigáu en sede xudicial na causa abierta pola querella presentada pol sindicatu por apropiación indebida, refugó que la robla qu'apaez en cheques y tresferencies seya de so.

Fontes xudiciales esplicaron que Fernández Villa, que namái retrucó a les entrugues de la so abogada, llegó a dicir que se sentía "ofendíu" énte les acusaciones.

El SOMA-UXT presentó en setiembre de 2015 una querella escontra Villa reclamando la devolución de 360.000 euros, ampliaos dempués hasta 420.000, en conceptu de gastos ensin xustificar asina como pola apropiación de dietes d'asistencia destinaes a los miembros del sindicatu por dir a xuntes del comité intercentros d'Hunosa.

Dientro la mesma querella'l SOMA-UXT reclama la devolución de más de 70.000 euros al ex-secretariu de la Fundación pa la Formación, la Investigación, la Documentación y los Estudios Sociales (Infide), Pedro Castillejo, que tamién negó llevar perres.

La declaración de Fernández Villa foi tres 11 recursos presentaos pola so defensa toos desestimaos y 14 meses dempués desque fuera citáu per primer vez.

La declaración, qu'entamó a les 10:05 hores y foi interrumpida pa facer un recesu a les 11:15 hores, retomóse a les 11:35 pa rematar a les 11:50 hores.

Fernández Villa tamién ye oxetu d'una investigación de la Fiscalía Anticorrupción al rodiu del orixe de los 1,4 millones d'euros que regularizó na amnistía fiscal de 2012.