Vox critica a Sánchez por "vender la soberanía d’España a los separatistes"

Concentración n’Uviéu y Xixón pa protestar escontra los alcuerdos de gobiernu

El diputáu nacional de Vox por Asturies, José María Figaredo, criticó esti domingu al presidente del Gobiernu, Pedro Sánchez, por "vender la soberanía de la nación, la llibertá, los Presupuestos Xenerales del Estáu y, en xeneral, a tolos españoles, a los separatistes vascos y catalanes y al comunismu, que se metió nel gobiernu".

Figaredo, que fizo estes declaraciones a los periodistes enantes de participar na concentración convocada pola plataforma "España existe" n’Uviéu, en favor de la soberanía y la Constitución española, apuntó que "hai munchos españoles" que nun tán dispuestos y nun quieren que’l Gobiernu d’España "venda la soberanía de la nación a los separatistes".

Dellos centenares de persones concentráronse esti mediudía na plaza del Ayuntamientu d’Uviéu pa protestar escontra los alcuerdos de gobiernu qu’afitó’l partíu socialista p’algamar la investidura de Pedro Sánchez.

Con glayíos a favor de la unidá d’España y del Rei y a la escontra del Gobiernu socialista, los independentistes, los comunistes y d’ETA, los asistentes enllenaron la plaza del Consistoriu con abondes banderes d’España.

El diputáu nacional de Vox recalcó que los españoles nun tán dispuestos a que’l Gobiernu y la soberanía del país "dependa d’esos partíos qu’esplícitamente afirmen qu’España impórta-yos un res".