Xixón estudiará la creación d’un área de baxa emisión como Madrid Central

Aurelio Martín, na presentación de la Selmana Europea de la Movilidá en Xixón

L’Ayuntamientu de Xixón estudiará la creación d’un área de baxa emisión al estilu de "Madrid Central", que llende’l tráficu rodáu nel centru de la ciudá, afirmó’l conceyal de Mediu Ambiente y Movilidá, Aurelio Martín.

Martín fizo estes declaraciones na presentación de les actividaes de la Selmana Europea de la Movilidá, que se celebrará en Xixón del 16 al 22 de setiembre.

L’edil afirmó que la creación d’un área de baxa emisión ye un tema que ta enriba la mesa y el Consistoriu estudiará, al empar qu’apuntó que ye un tema que, inclusive, pue venir impuestu de forma xerárquica dende l’alministración central.