Xixón presenta los sos presupuestos de cuasi 370 millones pa 2023

Les cuentes más cuantioses de la hestoria, con un 9% de medría

El Gobiernu del Conceyu de Xixón presentó esti vienres un borrador de presupuestos pa 2023 por cuasi 370 millones d'euros, el mayor de la hestoria, que supón una medría del 9% respecto al presente añu, empobináu a la promoción de l'actividá económica, l'empléu, les ayudes sociales y la sostenibilidá del mediu ambiente.

Los fondos europeos, unos 20 millones d'euros, contribuyeron a xubir el presupuestu pa 2023 a 369.473.042 euros, que contempla les tresferencies a organismos autónomos y empreses municipales.

El consistoriu va empezar el próximu añu con una prórroga presupuestaria de 308.714.232 euros, ante la imposibilidá d'aprobar les nueves cuentes enantes de febreru próximu, informó la conceyala de Facienda, Marina Pineda.

La conceyala aseguró que va treslladar el borrador esti vienres a los grupos municipales pa empezar una negociación lo enantes posible, a pesar de que "estos son díes difíciles" poles fiestes navidiegues.

El documentu afita unos ingresos y gastos por 269.354.673 euros, un 9,02% mayor que l'exerciciu anterior, con un aumentu del gastu corriente ordinariu del 1,98 por cientu, qu'obliga a faer un esfuerzu de contención nesi capítulu, indicó Pineda.