Xunta satisfactoria ente les cuidadores de menores con grandes discapacidaes y Marta del Arco

Polo menos 150 families tán nesta situación n'Asturies

Les cuidadores de menores con grandes discapacidaes van constituyise n’asociación nes selmanes vinientes. Asina lo acordaron dempués d’aconceyar esta mañana cola conseyera de Derechos Sociales, Marta del Arco.

Una xunta, dicen, mui satisfactoria, na que la conseyera amosóse dispuesta a trabayar a comuña p’algamar les sos principales reivindicaciones. La principal ye que la Llei de Dependencia reconoza los sos derechos llaborales, equiparables a les cuidadores profesionales.

Polo menos 150 families tán nesta situación n’Asturies. Enagora yá rexistraron na conseyería’l programa pilotu que ficieron con dalgunes de los sos principales pidimientos, como cuntar con espacios de respiru pa les families.