Yolanda Díaz va axuntar cola alcaldesa de Xixón y el presidente de l'Academia de la Llingua Asturiana

La vicepresidenta segunda entama güei una visita de dos díes a Asturies

La vicepresidenta segunda Yolanda Díaz entama güei una visita de dos díes a Asturies. Va tar nel antiguu teatru La Benéfica, en L'Infiestu, onde va caltener un alcuentru col artista Rodrigo Cuevas.

El so viaxe a Asturies allúgase nel procesu d'escucha entamáu por Díaz y nel so percorríu pa dar a conocer Sumar, el proyectu políticu del que formen parte, ente otros asturianos, l'ex-director xeneral de Salú Pública, Rafael Cofiño, y el filósofu César Rendueles.

Yá mañana, Yolanda Díaz va axuntar cola alcaldesa de Xixón, col presidente de l'Academia de la Llingua Asturiana, va caltener otru alcuentru con trabayadores y pela tarde va protagonizar un actu de Sumar na pista cubierta de Cimavilla.