Más de 400.000 persones descargaron l'aplicación 'MedusApp'

L'app atropa datos y localizaciones de meduses

Más de 400.000 persones descargaron l’aplicación 'MedusApp' creada por investigadores de la Universidá d’Alicante. Con ella atropen datos y localizaciones de meduses, como les qu’obligaron al pieslle de delles playes asturianes esti branu.

'MedusApp' ye ciencia ciudadana. Cada interacción esparde la mirada de los investigadores marinos pola nuestra costa. Namás na última selmana unviaron cuasi 1.800 informaciones al traviés d’esta aplicación, más de 80 dende les playes d’Asturies.

César Bordehore, director del Llaboratoriu Marín de la Universidá d’Alicante (MarLabUA-Dénia), esplica qu’asi a se traza en tiempu real un mapa de la so presencia nes sableres.

Los usuarios amás puen identificar la especie, hai unes 2.000, y qué facer en casu de recibir una de les sos picadures. Más de 2.700 unviaron esti encontronazu.

Por ciertu, toes piquen anque dalgunes nun nos provoquen de mano nenguna reacción. En dalgunes persones puen provocar alerxes alimentaries a los crustáceos.

'MedusApp' tamién inxerta la posibilidá de xeolocalizar la presencia de basura na mar. Los investigadores de la Universidá d’Alicante trabayen en facer esta 'app', disponible n’español y inglés, entá más políglota y interactiva.