La unidá de Neumoloxía Intervencionista del HUCA revoluciona'l diagnósticu del cáncer de pulmón

El métodu Ariza-Pallares dexa llograr amueses de gran calidá del mediastinu d'una manera mínimamente invasiva y rápida

En menos de diez minutos, los profesionales de la unidá de Neumoloxía Intervencionista del HUCA sacaron una amuesa conxelada del mediastinu con calidá pa diagnosticar un cáncer de pulmón o otros tumores, frente a la media hora llarga que lleven les técniques convencionales.

El Métodu Ariza-Pallares ye una revolución. Esta técnica mínimamente invasiva faise de manera ambulatoria con sedación, ye dicir ensin ingresu y ensin entueyos.

Nuna hora esti paciente ta faciendo vida normal, y en menos de 36 hores los especialistes tienen un diagnósticu concluyente, destaquen Miguel Ariza, neumólogu intervencionista del HUCA y Javier Pérez Pallares, neumólogu intervencionista del Hospital Xeneral Universitariu de Santa Lucía de Cartagena.

Guíase por aciu d’una ecobroncoscopia p'algamar el mediastinu, un cuévanu que ta detrás del esternón, ente los pulmones. Dempués de faer un punción, introducen una criosonda que conxela'l texíu 5 segundos a menos de 90 graos, pa estrayelu.

Esa amuesa dexa facer biomarcadores, esenciales pa un tratamientu a la carta, de manera rápida y eficaz, destaquen Luis Manuel Fernández, patólogu de la sección de Citopaloxía del HUCA y Francisco López, xefe de Neumoloxía Intervencionista del HUCA.

El neumólogu Miguel Ariza pensó esti procedimientu que probó xunto col so colega Javier Pérez Pallares en xineru de 2022. Dende entós ye rutina. Nel HUCA ficieron 480 procedimientos como'l que güei vieron de manera telemática unos 5.000 neumólogos de tol mundu. Esti equipu yá ye toa una referencia internacional.