Galbán dona 43.000 euros recaldaos nes carreres escontra'l cáncer pa investigar el glioma infantil

L'estudiu va llevalu alantre la investigadora Isabel Quirós

Investigar el glioma, un tipu de cáncer cerebral, nos neños, ye l'oxetivu de l'ayuda de más de 40.000 euros qu'apurrió l'asociación Galbán a la Fundación pa la Investigación Biosanitaria d'Asturies.

L'estudiu va llevalu alantre la investigadora Isabel Quirós. El dineru vien de lo que recalda l'asociación de families de neños con cáncer nes carreres añales. La investigadora va usar nueves tecnoloxíes que dexen ver los vasos sanguíneos de los que se nutren los tumores en celebros infantiles, nos que'l tumor ye muncho más agresivu.

Hasta agora la investigación centróse nos tumores d'adultos, pero non nos infantiles.