AsturExplorers gana l'hackathon NASA SpaceApps Challenge

L'app 'Landsat Connect' dexa definir asitiamientos y recibir notificaciones sobre los pasos de los satélites

AsturExplorers ye’l nome del equipu que ganó l’hackathon NASA SpaceApps Challenge. L’aplicación 'Landsat Connect' fízo-yos imponese na categoría de 'Meyor conceptu de misión'. La so app foi escoyida ente 9.960 proyectos y sedrá presentada énte inxenieros de la NASA.

Desendolcaron una aplicación que dexa definir asitiamientos y recibir notificaciones sobre los pasos de los satélites Landsat 7 y 8 per esos puntos. Con ella fáense accesibles los datos venceyaos a les imáxenes tomaes por estos satélites qu’abarquen 10.000 metros cuadraos, de mou que los resultaos seyan aplicables a campos como l’agricultura.

Como premiu a los sos esfuerzos tendrán la oportunidá de viaxar al Goddard Space Flight Center pa presentar el so proyectu énte inxenieros de la NASA. Con ello esperen algamar el sofitu p’acabar el desendolcu de l’app con ADN asturianu, andaluz, arxentín y moldavu.

Enagora busquen la financiación afayadiza p’afrontar el viaxe porque’l premiu namás inclúi l’accesu a la NASA. Aseguren que tán faciendo contactos, pero que si fai falta, fadránse cargu del gastu pa que tol equipu viaxe.

El 4 de xunu tarán na NASA como ganadores d’una de les 10 categoríes de la competición.