Cada euru invertíu n'anovación xeneró 2,5 euros de riqueza n'Asturies

Por cada millón d'euros n'ayudes públiques n'anovación créense 31 trabayos al añu

En 2021, el Principáu destinó 90 millones d’euros a investigación, desendolcu y anovación que se repartieron ente unes 200 empreses y instituciones. Por cada euru invertíu xeneráronse 2,5 euros de riqueza nel sistema productivu asturianu, según señaló André Carrascal, autor del informe.

La Cátedra pal Análisis de l’Anovación n’Asturies foi la encargada de facer un informe precursor n’España, porque calcula l’impactu de la inversión pública nun añu, y tamién nel trabayu.

El conseyeru de Ciencia, Anovación y Universidá, Borja Sánchez, destacó que, por cada millón d’euros invertíos en ciencia y anovación creáronse 31 puestos de trabayu.

El sector priváu recibió 30 millones d’euros, la Universidá d’Uviéu 34 y el restu foi pa fundaciones, centros d’investigación y otros centros educativos, señaló’l rector de la Universidá d’Uviéu, Ignacio Villaverde.

A llargu plazu, onde los efectos d’esti tipu d’inversiones son mayores sobre’l bienestar de la sociedá, l’estudiu calcula que la productividá n’Asturies meyoraría un 0,2% añalmente na década viniente.