El CSI desendolca bebederos que previenen enfermedaes del ganáu

Los recubrimientos impiden l'espardimientu de patóxenos y mengua l'usu d'antibióticos

El Centru d’Investigación en Nanomateriales y Nanotecnoloxía del CSIC ta desendolcando un revestimientu antimicrobianu pa los bebederos que mengüen la incidencia d’enfermedaes nos animales.

Esti proyectu, nel que collaboren el Centru Tecnolóxicu Asinca y l’Asociación Nacional de Criadores de la raza Asturiana de los Valles, espera tar validáu nun añu pa la so comercialización.

TPA Noticies entra nel llaboratoriu de biomateriales del Centru d’Investigación de Nanotecnoloxía del CSIC onde preparen distintos recubrimientos que torguen l’espardimientu de patóxenos nos bebederos d’aceru inoxidable.

Belén Cabal Álvarez, investigadora del Centru d’Investigación en Nanomateriales y Nanotecnoloxía (CINN), esplica que’l proyectu, qu’asciende a 140.000 euros financiaos con fondos europeos, aborda una solución preventiva pa parar les infecciones nos animales. Poro, mengua l’usu d’antibióticos.

Pa crear esa película antimicrobiana usen un material vitreo inorgánico, inocuo pa la salú y el mediuambiente, que tendrá que ser amás sostenible económicamente.

La eficacia bacterizada, funxicida y viricida d’esti nuevu material ta validándose nos llaboratorios d’Asincar. Esi prototipu in vitro probaráse nel primer semestre de 2025 n’esplotaciones de vacunu de 'asturiana de los valles'.

Si too va bien, la empresa Nanoker Research fabricará esti productu certificáu nes sos instalaciones de Lluniego, pa llueu sacalu al mercáu. Sedrá un productu únicu resultáu de la innovación asturiana.