L'AEPD esixe una mayor tresparencia a los editores de páxina web qu'usen cookies nes sos plataformes

Les nueves imposiciones quieren que los usuarios puean decidir d'una forma más consciente

Entramos a cualquier páxina web y lo primero que vemos ye'l testu llegal que nos alvierte del usu de cookies. Preséntensenos dos opciones: aceptales o refugales. Sicasí, pocos lleen la lletra pequeña.

Les cookies rastrexen, ente otres coses, los conteníos que visitamos, los productos que mercamos al traviés d'Internet, dende onde nos conectamos o'l tiempu que tamos en cada páxina. De siguío les empreses usen esta información con fines publicitarios.

El Comité Européu de Protección de Datos detectó patrones engañosos que convidaben a los usuarios a aceptar les cookies prácticamente ensin dase cuenta.

Nesti contestu y coles mires de llograr una mayor tresparencia, l'Axencia Española de Protección de Datos impunxo una serie de cambeos que tendrán d'implementase en toles páxines web.

Pa evitar sanciones, toles plataformes tendrán d'adaptase a la nueva normativa enantes del 11 de xineru.