Munchos vecinos siguen ensin fibra óptica y ensin una conexón a internet afayadiza

La rede de cobre ADSL de Telefónica da pasu a la fibra óptica'l vienres viniente

El vienres 19 d’abril viniente dexará de funcionar la rede de cobre ADSL que tien Telefónica pa dar pasu a la fibra óptica. Un pasu pal futuru que se resiste en dalgunos llugares d’Asturies onde nun algamó entá tener bones conexones telefóniques.

Los vecinos piden un mayor control del trabayu fechu poles empreses axudicataries pa que les tecnoloxíes seyan efectives.

Toles compañíes telefóniques acabarán por sustituyir la rede de cobre por fibra hasta 2025.

Juan Manuel Blanco vive n’Illas. Tanto él como los sos vecinos siguen ensin tener una bona cobertura de telefonía, anque la fibra óptica yá llegó al conceyu. Munchos optaron pola telefonía vía satélite, pero tampoco funciona bien.

Los más afectaos son los profesionales que nun tienen accesu a Internet pal so trabayu y les persones mayores.

Lo mesmo pasa na parroquia de Llaviana, en Gozón, onde los sos nueve pueblos nun tienen fibra óptica. Los vecinos piden un mayor control del trabayu fechu poles empreses axudicataries del contratu pa llevar la tecnoloxía.

Tamién el polígonu de Maqua sigue ensin fibra óptica y ensin una conexón a internet afayadiza, lo que repercute nes empreses.

Según datos del Ministeriu de Tresformación Dixital, más de 10.000 asturianos siguen ensin fibra óptica y namás el 77% de la población tien accesu a Internet.