Primer simulador portátil pa la formación continua de controladores de tráficu marítimu

El Centru de Seguridá Marítima Integral Xovellanos acaba d'algamar la homologación

El Centru de seguridá Marítima Integral Xovellanos acaba d’algamar la homologación del primer simulador portátil pa la formación continua de controladores de tráficu marítimu qu’hai nel mundu. Esti simulador, que funciona al traviés d’una aplicación desendolcada nel centru, dexa a los controladores formase y anovar les sos certificaciones ensin tener que dir a Xixón.

N’España, hai más de 300 controladores de tráficu marítimu. La so certificación profesional anóvase cada cinco años. Pa ello, tienen que llevar alantre un procesu de formación continua que depende del Centru Xovellanos.

D’ehí que’l Centru diseñare, en collaboración con Signal Software, una empresa del Parque Científico–Tecnolóxicu, el primer simulador portátil del mundu pa facer esta formación práctica.

El simulador ufierta una presentación gráfica, la execución de los exercicios y la grabación de los mesmos. Esto último ye clave, porque dexa facer un autoanálisis de los aciertos y los errores fechos na práctica.

Centros integrales d’otros países yá s’interesaron por un proyectu precursor y de factura asturiana.