Un estudiu de la Universidá d'Uviéu afita'l calentamientu de la Tierra

Javier Calleja y Álvaro Bueno acaben de volver de la base antártica española

La última campaña polar española dexó a tres investigadores de la Universidá d’Uviéu afitar que l’albedu, porcentaxe de lluz solar reflexao, ta menguando de forma mui rápida en L’Antártida.

Javier Calleja y Álvaro Bueno acaben de volver de la base antártica española. Entá esperen a que llegue’l buque 'Hespérides ' coles muestres y el material pal so estudiu al detalle.

El mes de trabayu sobre’l tarrén dexólos, sicasí, sacar les primeres conclusiones, esplica Javier Fernández Calleja, profesor titular de Física y investigador principal del proyectu 'PALANTARICE'.

Que l’este de L’Antártida, el continente que reflexa más lluz solar por tar cubiertu de ñeve, tea perdiendo parte del so albedu, porcentaxe de radiación reflexao, tien importantes implicaciones nel clima.

Pa descubrilo repitieron los mesmos esperimentos que fizo la so compañera d’investigación Susana Fernández na anterior campaña.

L’usu d’albedómetros, espectroscopía y microscopía sobre’l tarrén confirmó la medría del granu de la ñeve y la presencia d’impureces volcániques, nicios de que L’Antártida pierde rápidamente capacidá pa reflexar la radiación solar.

La rugosidá del tarrén, otru elementu del que depende l’albedu, sedrá oxetu d’análisis nuna campaña viniente.