Un estudiu destaca la importancia de la educación p'algamar el máximu retornu de la inversión n'I+D+i

Un sistema innovador fuerte que dexe al Principáu algamar un progresu económicu sustancial

Impulsar mayores inversiones n’I+D+i con más profesionales con altu nivel de formación ye la principal recomendación del últimu informe de la Cátedra pal Análisis de l’Innovación n’Asturies (C_InnovA) pa que’l Principáu puea rematar un sistema innovador rexonal fuerte que lu dexe algamar un progresu económicu sustancial.

L’estudiu más recién d’esta cátedra centróse nel efectu de la I+D+i na medría y la converxencia de los territorios europeos, con especial atención al casu d’Asturies, informa la entidá docente.

El trabayu afita que la inversión n’I+D+i, por sí sola, nun ye abonda pa facilitar la converxencia ente les rexones europees del Norte y del Sur.

Sicasí, los autores de la investigación solliñen que la inversión n’educación, en capital humano altamente cualificao, ye un factor crucial pa que la I+D+i impacte sobre la medría económica de rexones menos desendolcaes, como’l casu d’Asturies.