Verificación d'edá ensin nomes nin apellíos: asina impediráse que los menores vean porno

Esti métodu forma parte del "alcuerdu de país pa la protección de los menores n'internet", anunciáu por Sánchez

Un certificáu anónimu qu’acreite la mayoría d’edá del usuariu d’una web pero nun comparta la so identidá nin más datos col proveedor de conteníos ye’l mecanismu nel que trabaya la Fábrica Nacional de Moneda y Timbre (FNMT) pa impedir l’accesu de los menores a conteníos nocivos como la pornografía.

La puesta en marcha d’esti métodu, liderada pola Axencia Española de Protección de Datos (AEPD) y na que tuvieron implicaos dellos ministerios como’l del Interior o’l de Tresformación Dixital, forma parte del "alcuerdu de país pa la protección de los menores n’internet" anunciáu ayeri pol presidente del Gobiernu, Pedro Sánchez.

L’alcuerdu, amás de la creación d’esta clase de dispositivos pa impedir l’accesu de conteníos nocivos a los más pequeños, inxerta l’aprobación d’una llei integral nesta materia y una estratexa multidisciplinar dende l’ámbitu de la educación, de les competencies dixitales y la igualdá.

Una app pa móviles y un códigu QR pa escaniar nel ordenador

Según esplicó l’AEPD na presentación del mes pasáu, la idea ye desendolcar una aplicación móvil, que tará disponible pa tolos sistemes operativos, de manera que’l proveedor de conteníos puea asegurase de que l’usuariu tenga instaláu esti atributu nel so teléfonu.

Atributu que sedrá como un certificáu dixital de la Fábrica Nacional de Moneda y Timbre, al estilu de los que s’usen davezu p’acreitar la identidá al facer trámites n’internet, pero cola particularidá de que sedrá anónimu pal proveedor.

Podrá algamase al traviés d’un documentu oficial como’l DNI, el pasaporte o’l carné de conducir, pero nun tendrá más datos personales del usuariu, de forma que nun se compartirá col proveedor de conteníos información como’l nome o la edá exacta del usuariu, lo qu’evitará males práctiques como’l perfiláu masivu o’l tratamientu de datos innecesarios.

Nel casu de los ordenadores o les consoles de videoxuegos, la mesma aplicación emitiría un códigu QR, que podría lleer el dispositivu, pa confirmar que l’usuario ta autorizáu p’acceder.