Baker, Jumper y Hassabis ganen el Nobel de Química

Galardonaos por revelar códigos de proteínes por aciu d'intelixencia artificial          

El Nobel de Química premió esti miércoles a David Baker y John M. Jumper, dambos de los Estaos Xuníos, y al británicu Demis Hassabis por descifrar el códigu de les estructures de les proteínes al traviés del usu de la computación y la intelixencia artificial (IA).

Hassabis y Jumper usaron la IA pa predicir la estructura de cuasi toles proteínes conocíes; Baker desenvolvió métodos computerizaos pa crear proteínes que nun esistíen primeramente y, en munchos casos, con nueves funciones, señaló na so motivación la Real Academia de les Ciencies sueca.

Los sos afayos dexen una meyor comprensión de les funciones vitales humanes, ente elles el porqué de delles enfermedaes y la forma en qu'asocede la resistencia antibiótica; y la creación de nuevos nanomateriales, minisensores y una industria química menos contaminante, amás d'acelerar el desenvolvimientu de vacunes.

Les proteínes son les molécules que faen posible la vida; los lladriyos que formen los güesos, la piel; los motores qu'impulsen los nuesos músculos; les máquines que lleen, copien y reparen l'ADN; les que caltienen les nueses neurones y el nuesu celebru llistos, anticuerpos que dexen la nuesa respuesta inmunitaria.

Asina lo resumió Johan Aqvist de l'Academia Sueca de Ciencia pa esplicar el premiu y amestó que ”pa entender cómo funciona la vida, primero tenemos qu'entender la forma de les proteínas”.