Premiáu un proyectu qu'usa tecnoloxíes pa meyorar la vida de persones con discapacidá visual

Ye un sistema de radar portátil que dexa a les persones detectar torgues nel so entornu

Una investigadora asturiana de la Universidá d’Uviéu foi galardonada col premiu nacional na primer edición del certame 'Inxenieros Mozos por un Mundu Meyor'. La estudiante, orixinaria de Cangas del Narcea, desendolcó un innovador proyectu qu’usa tecnoloxíes pa meyorar la vida de persones con discapacidá visual.

La tesis d’Alicia Flórez consiste n’identificar el tipu d’antena más afayadiza pa desendolcar una aplicación destinada a asistir a persones invidentes mediante un sistema radar portátil, que los dexa detectar torgues nel so entornu.

La investigación enfocóse n’optimizar la detección a media distancia y p’alcontrar oxetos más cercanos aprovechando’l movimientu natural de los brazos al caminar.

Anguaño, ta nuna fase d’investigación na que la so proposición marcó pautes pa futures llinies de trabayu.

El 8 d’ochobre pasáu, dempués de cuatro años de preparación xunto a dos directores de tesis, Alicia recibió’l so primer premiu en Madrid, dau pol Institutu de la Inxeniería d’España, en reconocimientu a los llogros de la so investigación.

L’estudiu centróse nel diseñu de dellos tipos d’antenes y na fechura de mediciones con un radar comercial, col envís d’asegurar la so eficacia na detección de torgues y, d’esti mou, facilitar la vida de les persones con discapacidá visual.

La investigadora presentará la so tesis doctoral, "'Antenas wearable' para nuevas aplicaciones radar", esti mes de payares.