El Centru Tecnolóxicu Forestal diseña una barrica de carbayu afayadiza pa sidra o güisqui

L'aparatu escueye la madera de forma automática y amuesa aspeutos de la mesma que podríen influyir nel productu

Col allugamientu de la duella entama'l procesu del prototipu compuestu por tres partes qu'analiza les propiedaes de la madera de carbayu. Consíguese gracies a los cinco disparos de la so célula fotoeléctrica y amuesa aspeutos como la porosidá, el tamañu de granu o cómo influyiría na bébora que va tener señala Amelia González, coordinadora del proyectu y miembru del Llaboratoriu de Bioproductos del Cetemas.

Una técnica que yá s'usa n'otros países con tradición tonelera amestada especialmente al vinu pero qu'equí pue sirvir tamién pa la sidra, la cerveza o llicor, yá que quier faese llegar a les empreses locales. Y ye que la madera de carbayu asturiano tresfier al productu propiedaes singulares apunten Blanca Fresno, maestra cervecera y Tino Panizales, del Llagar Panizales.

Un apueste pola anovación y revalorización de les materies primes nel mesmu territoriu nel que s'invirtieron 170.000 euros asegura Begoña López, directora xeneral d’Agroindustria y Desenvolvimientu rural.

Tamién se busca promover una xestión afayadiza y esplotación del carbayu con una demanda que, amás, ye cada vez mayor y que lleva cuasi un sieglu unviándose por exemplu a los toneleros de Jerez.