Bañistes de playes y piscines asturianes recibirán mensaxes científicos per megafonía

Los mensaxes del proyectu tán destinaos a ser d'utilidá pa la ciudadanía y a lluchar escontra la desinformación espardida al traviés de redes sociales y internet

Espertar l’interés pola ciencia y l’espíritu críticu de los bañistes nel mes d’agostu ye l’oxetivu que se marcó la Universidá d’Uviéu con "Voces por la Ciencia", una iniciativa que se valdrá de la megafonía de playes y piscines asturianes pa esparder mensaxes científicos.

La presentación tuvo llugar esti llunes na Universidá d’Uviéu, con presencia de la vicerrectora d’Investigación, Irene Díaz, xunto a Manuel Montejo y Covadonga Huidobro, dos de los tres investigadores encargaos de facer los venti mensaxes que, con una duración máxima de trenta segundos, van emitise en playes de Cuideiru, Tapia, Muros de Nalón, Carreño, Villaviciosa y Ribeseya, asina como nes piscines de La Pola (L.lena) y Llamorgal.

Los mensaxes del proyectu, que cunta cola collaboración del Ministeriu de Ciencia y Universidaes al traviés de la Fundación Española pa la Ciencia y la Tecnoloxía (Fecyt), aborden dellos temes científicos venceyaos col branu, como la mar, les playes o’l sol y tán destinaos tamién a ser d’utilidá pa la ciudadanía y a lluchar escontra la desinformación espardida al traviés de redes sociales y internet.