Borja Sánchez apuesta por un llaboratoriu certificador d'epis n'Asturies

"N'Asturies tenemos potencial mui grande pa facer esti tipu de pruebes"

El conseyeru de Ciencia, Anovación y Universidá, Borja Sánchez, defendió esti miércoles la necesidá de qu'Asturies cuente con un llaboratoriu certificador d'equipos de protección individual y de productos sanitarios de cara a medrar la capacidá de rempuesta énte nueves crisis.

"Yo voi pelear y lluchar. Sedría interesante tener a un organismu certificador cerca porque axilizaría la llegada de productos", señaló na so comparecencia énte'l grupu de trabayu creáu na Xunta Xeneral p'analizar la evolución de la pandemia.

Tamién defendió contar nel Principáu con un llaboratoriu certificador qu'acreíte sistemes electrónicos pa dar de pasu otru tipu de dispositivos como respiradores, según punxo d'exemplu.