El BCZ guarda más de 180.000 dosis de xermoplasma de les seis races autóctones asturianes en peligru de desaniciu
![Un rebaño de oveja xalda en una ganadería asturiana](https://www.rtpa.es/fotos//22/11/20221123095834_RTPA2815984.jpg)
L'oxetivu ye evitar que races con una capacidá especial p'adaptase al tarrén acaben por estinguise
Creáu nel añu 2004, el Bancu de Recursos Zooxenéticos del Serida algamó guardar en nitróxenu llíquido más de 180.000 dosis de xermoplasma. Son muestres de semen, óvulos y embriones de les seis races autóctones asturianes en peligru de desaniciu: la vaca casina, la oveya xalda, la cabra bermeya, el caballu asturcón, el gochu asturcelta y la pita pinta.
L’oxetivu ye tener el mayor númberu de muestres de distintos animales que pola so morfoloxía y xenes dexe caltener la mayor diversidá xenética de cada raza. Sobre manera races autóctones que supieron, como les asturianes, adaptase mui bien al so territoriu.
Un trabayu que’l Serida presentó na Xunta Xeneral del Principáu. Quier insistir na importancia del caltenimientu de les races autóctones. N’España, de les 165 variedaes autóctones existentes, 140 tán en peligru de desaniciu.
Dende va dos años, el Centru de Biotecnoloxía Animal de Deva trabaya p’aplicar la so esperiencia con races autóctones domesticaes a la recuperación d’una especie xabaz como ye’l casu del gallu montés cantábricu.