El Principáu financia les estancies nel estranxeru de 49 investigadores predoctorales

Una nueva convocatoria d'ayudes pa favorecer la movilidá nel programa Severo Ochoa

El Gobiernu d'Asturies financia les estancies internacionales de 49 investigadores predoctorales pertenecientes al programa Severo Ochoa, una de les cifras más altes de los últimos años.

La Conseyería de Ciencia, Empreses, Formación y Empléu resolvieron una nueva convocatoria d'ayudes, con una aportación de 142.522 euros, pa favorecer la movilidá del personal investigador que ta faciendo la so tesis doctoral.

Esti programa financia con un máximu de 3.000 euros estancies temporales, d'ente unu y tres meses en centros d'investigación d'acreitada escelencia. Les persones beneficiaries deben contar yá con un contratu Severo Ochoa pa la formación n'investigación y docencia na que fadrán la tesis.

Bélxica, Estaos Xuníos, Portugal, Reinu Xuníu, Méxicu, Xapón, Irlanda, Francia, Italia, Austria, Finlandia, Alemaña, Dinamarca, Brasil o Suecia son dellos de los países de destín del personal predoctoral asturianu.

Nes seis convocatories resueltes dende 2019 recibieron fondos pa cubrir les sos estancies nel estranxeru 214 científicos. La medría de solicitús de los últimos años llevó a un aumentu nel presupuestu destináu a esti programa.

La directora xeneral d'Universidá, Cristina González, destacó l'esfuerzu que fai'l Principáu p'atender toles solicitús y afondaron nel enfotu del Gobiernu d'Asturies en que naide quede fuera de la convocatoria por cuestiones económiques. "L'oxetivu foi siempre atender toes peticiones na midida de les nuestres posibilidaes", afitó.

Estes estancies de movilidá faciliten l'aprendizaxe en llaboratorios d'investigación, l'alquisición de nueves técniques instrumentales y otres xeres directamente venceyaes cola formación, dientro d'un centru d'investigación internacional d'acreitáu prestixu.