Investigadores volcaos na llucha escontra’l coronavirus

Una iniciativa fabrica viseres impreses en 3D pa protexer a los sanitarios

Cada vegada más investigadores vuélquense na llucha escontra’l coronavirus en dellos ámbitos.

Vicente Suárez, de Les Regueres, trabaya en Thyssenkrupp Norte de Mieres. Va unos días en redes sociales vio una iniciativa llamada 'coronavirusmakers' que buscaben voluntarios que tuvieren impresores 3D pa facer una serie de componentes d’equipos de protección individual pa poder entregar a personal sanitario, cuidadores y profesionales que tuvieren más espuestos col coronavirus.

Vicente esplica que los grupos de trabayu tienen distintes xeres, unos collaboren nel diseñu del respirador, que yá ta nes últimes fases de diseñu y otros, como’l grupu de trabayu nel que ta Vicente, tien como misión diseñar un tipu de viseres que reforzaríen la seguridá de tol personal sanitario y les persones que tienen que tar en contacto coles persones que van a facese pruebes.

Vicente convirtió’l so cuartu nuna unidá de producción de viseres. Caúna tarda unes cuatro hores en facese y al día yá produz cuatro.

Como él cientos d’asturianos ayuden de forma coordinada dende les sos cases p’ayudar nuna guerra que, como toes, non solo se gana nel frente sinón tamién teniendo una retaguardia bien organizada.