L'observatoriu astronómicu d'Allande llicitaráse en primavera

Con una superficie de 90 metros cuadraos y aula didáctica, sedrá un edificiu autosuficiente

Ente aplausos foi recibíu l’esperáu diseñu de la estación astronómica d’Allande. El proyectu, del estudiu Puerto & Sánchez Arquitectos, ta inspiráu nes galaxes en forma d’espiral y, con una superficie d’unos 90 metros cuadraos, cuntará con un porche-refuxu, aula didáctica, bañu y un patiu interior abiertu que servirá de zona d’observación. Esplícalo l’arquitectu José Ramón Puerto.

Anque’l puntu exactu del allugamientu ta pendiente de los informes de l’Aemet sobre les hores y díes de ñublina, sí se sabe que tará ente L’Altu’l Palu y L’Altu la Marta, na contornada de la fana de La Freita y el Camín Primitivu de Santiago.

El proyectu presentóse nel Segundu Alcuentru de Turismu d’Estrelles n’Allande. Una apuesta, la del astroturismu, na que’l conceyu lleva dellos años trabayando y ye’l primer conceyu 'starlight', como cunten l’alcaldesa, Mariví López, y l’astrofísica y promotora del proyectu Allande Stars, Lucía González.

La estación astronómica ye ún de los proyectos inxertos nel Plan de Sostenibilidá Turística p’Allande, que cunta con una partida del Principáu al traviés de fondos europeos de más de 200.000 euros. La previsión ye que la obra puea salir a contratación la primavera viniente.