La inmunidá de Pfizer y Moderna ye mayor y caltiénse estable nel tiempu

Un estudiu evidencia que les vacunes xeneren anticuerpos al 85% de los vacunaos

Toles vacunes alministraes n'España son segures y eficaces pero la inmunidá qu'apurren los sueros de Pfizer y Moderna ye más duradera y caltiénse de forma estable nel tiempu, inclusive percima de los 11 meses, según un estudiu del Conseyu Xeneral de Colexos Farmacéuticos presentáu esti vienres.

L'estudiu "Seguridad y seroprevalencia en población vacunada frente a la COVID-19 de la red de farmacias centinela de Castilla y León", ellaboráu por 121 farmacies sobre una amuesa de 4.000 persones, evidencia que les vacunes xeneren anticuerpos al 85% de los vacunaos, porcentaxe que xube'l 97% cuando los individuos pasaron primeramente la infección.

Sicasí, l'estudiu constata que la inmunidá de les vacunes AstraZeneca y Janssen ye más baxa, y a partir de los siete meses amuesen un amenorgamientu de la respuesta. Esta mengua na inmunidá ye más significativa si l'individuu nun pasó primeramente'l coronavirus.