La robotización enllena d'incertidume'l futuru del mercáu llaboral

Podríen perdese dos de cada 10 puestos de trabayu n'España

Nuna economía en transición dixital parte de los empleos van perdese. Ye l'avisu de la OCDE dende Alemaña, qu'alvierte de que’l 22% de los puestos de trabayu qu'hai n'España dexarán d'esistir.

La Organización pa la Cooperación y el Desenvolvimientu Económicos fai un análisis de toa Europa y apunta a que’l nuesu país tien una situación más difícil que los sos vecinos pola precariedá y la temporalidá, y pide la collaboración de Gobiernu, empreses y trabayadores pa una transición que "funcione pa toos".

Esi cambiu de modelu represéntalu l'antigua fábrica de gaites en Santu Adrianu. Güei aspira a allugar nuevos proyectos tecnolóxicos dientro del llaboratoriu d'innovación ‘Rural Experimenta' col que se van instalar nun espaciu empreses como la dedicada a recuperar antigües cuadres y construcciones.

Dende CTIC en Xixón trabayen p’animar a neños y neñes a qu'estudien carreres rellacionaes con nueves tecnoloxíes y qu'anque haya empleos tradicionales que se pierdan, necesítense más vocaciones tecnolóxiques.

Y mientres siguen trabayando en desenvolvimientos dixitales pa empreses, alvierten de que’l 65% de los empleos de dientro de 30 años nun somos capaces d'imaxinalos.