![Zanja donde han encontrado restos arqueológicos en Castropol](https://www.rtpa.es/fotos//19/08/20190806135941_20190806vtrhallazgos.jpg)
Les pruebes apunten a la esistencia d'una mina
En Castropol, les obres d'urbanización d'un céntricu solar sacaron a la lluz unes enigmátiques canales que sorprendieron enforma a los arqueólogos. Fixéronse pruebes que confirmen qu'hai restos del sieglu II e.C., pero hai que siguir estudiando'l xacimientu.
Naide ye capaz d'iguar el mayor enigma arqueolóxicu del Principáu. La sorpresa ente los arqueólogos asturianos, tamién de dellos gallegos, ye total.
Nes canales atopaes, poco avezaes, fíxose la prueba del carbonu-14 a dellos restos y confirmaron la esistencia de restos previos a Cristu. Refúgase que seya un castru, porque nun hai restos d'asentamientos nin nada asemeyao, polo que se cree que pue ser una mina, pero entá nun se sabe de qué material.
Si va sieglos foi una mina hai que saber qué buscaben, por eso ficiéronse pruebes xeolóxiques nel sustratu pa salir de duldes. Un arqueólogu del Principáu visitó güei'l llugar.
Patrimoniu tien la última palabra agora pa dexar o non que la construcción d'una trentena de viviendes siga.
Pal promotor d'esta obra, la sorpresa tamién foi mayúscula. Lleva 11 años esperando pa entamar y siempres-y surdieron problemes. Ésti, asegura, ye unu más.
Dellos curiosos, inclusive, bromeaben güei cola posibilidá, inclusive, d'atopar momies. Too van ser conxetures hasta que conozamos los resultaos de los nuevos análisis que podríen llegar a finales d'esti mes.